ALPHAGənclik gözəllikdir. Daim bizimlə qalacağını sanıb, gözümüzü açana qədər bizi tərk edən zəriflikdir.
Gənclik çılğınlıqdır… Cəsarətlə, çəkinmədən, gözüyumulu qorxularının üstünə getməkdir. “Mümkünsüz” dediklərini mümkün saymaq, bunu sübut etmək üçün dəfələrlə yıxılmaqdır və hər dəfə yenidən qalxmağı bacarmaqdır.
Gənclik bəzən səhvlər etməkdir… Və bəxtin gətirsə, onların sayəsində öyrənməkdir… Bir addım daha irəli atmaq, bir zərrə təcrübə qazanmaq, bir az püxtələşməkdir..
Gənclik saflıqdır… Hiylədən, qarşına çıxan tələlərdən xəbərsiz olmaq və bəzən də bu saflığına görə onlardan gözlənilmədən, qeyri-adi şəkildə sıyrılmağı bacarmaqdır…
Gənclik enerjidir… Bitməyən… Tükənməyən.. Hər şeyə yetişə bilmək, yuxudan vaz keçib tamamladığın “deadline”-lar, sonradan onların sənə gətirdiyi fəxarətdir.
Bəzən dodaquçuran macəradır Gənclik… Dönüb arxaya baxanda “indiki mən olsam etməzim” fikirləşib, amma ürəyinin dərinliyində “yenə fürsətim olsa, yenə edərdim” deməkdir. Və bu cəsarətinlə qürur duymaqdır, gənclik…
Gənclik irəlidə deyəcəyin “kaş”-ları “yaxşı ki”-lərlə əvəzləmək üçün hər yeni gün başlayanda təkrar-təkrar verilən fürsətlərdir…
Və bir də…
Gəncliyin yaşı yoxdur… O bəzən 15 yaşındadır, bəzən də 75…
Gənclik bizim ruhumuzdur, gənclik bizim özümüzük. Günümüz mübarək!
Lalə Rəsulova
© 2018 · coaching.az
